Telefonların qeydiyyat rüsumu azaldılıb: qiymətlər açıqlandı

Azərbaycanda fiziki şəxslərin şəxsi istehlakı üçün ölkəyə gətirilən mobil cihazların qeydiyyat rüsumu azaldılır.

Bu, Milli Məclisin İqtisadi siyasət, sənaye və sahibkarlıq komitəsinin bugünkü iclasında müzakirə edilən “Dövlət rüsumu haqqında” Qanuna dəyişiklikdə öz əksini tapıb.

Bazar qiyməti 100 ABŞ dollarından çox olmayan və foto, videoçəkiliş və internetə çıxış funksiyaları olmayan mobil cihazlar üçün rüsumun 20 manatdan 15 manata endirilməsi təklif edilir.

Bununla yanaşı, bazar qiyməti 100 ABŞ dollarına qədər olduqda – dövlət rüsumunun 30 manatdan 20 manata, 101 ABŞ dollarından 200 ABŞ dollarına qədər olduqda – 50 manatdan 30 manata, 201 ABŞ dollarından 400 ABŞ dollarına qədər olduqda – 60 manatdan 40 manata, 401 ABŞ dollarından 700 ABŞ dollarına qədər olduqda – 70 manatdan 50 manata, 701 ABŞ dollarından 1000 ABŞ dollarına qədər olduqda – 100 manatdan 70 manata, 1001 ABŞ dollarından yuxarı olduqda – 150 manatdan 100 manata endiriləcək. Bundan başqa, telefonun marka və modeli, habelə bazar qiyməti rəsmi saytda yerləşdirilməyən mobil cihazların qeydiyyat rüsumları isə 20 manatdan 15 manata azaldılır.