Trampın yenidən lider olması kriptovalyuta sektoruna necə təsir etdi? | İqtisadçı açıqladı

Azərbaycanda kriptovalyutalar ilə bağlı ilk dəfə dörd yeni tətbiq altı ay ərzində sınaqdan keçiriləcək.

Buraya yerli kriptovalyuta, onunla bağlı platforma, alqı-satqı və kriptocüzdana köçürmə kimi məhsullar aiddir.

Digər tərəfdən kriptovalyuta ritorikası ilə seçilən Donald Trampın ABŞ-də prezidentlik uğrunda gedən mübarizədə qalib gəlməsi bu sektorda ciddi canlanma yaradıb.

İqtisadçı Rəşad Həsənov bildirib ki, Azərbaycan bazarı bu sahədə zəif inkişaf edib:

“Ümumiyyətlə, maliyyə savadlılığının aşağı olması, investisiya bazarları ilə bağlı mühitin zəif olması faktorları, yığım imkanlarının aşağı səviyyəsi bu bazarın qısamüddətli dövrdə sürətli inkişafı ilə bağlı gözləntiləri aşağı salır”.

Bəs bütün bunlar kriptovalyutaların ölkəmizdə də yatırım alətinə çevrilməsinə imkan verə bilər?

Rəşad Həsənov deyir ki, Azərbaycanda kriptovalyuta ilə bağlı müəyyən təşəbbüslər var. Həmçinin Mərkəzi Bank fəal strategiya həyata keçirir. Bu baxımdan ekspert hesab edir ki, kriptovalyuta bazarı yaxın 10 ildə azərbaycanlı investorlar üçün qısamüddətli və riskli yatırımlar istiqamətlərində əhəmiyyətli alətə çevriləcək.