1914-cü ilədək bütünlüklə azərbaycanlılardan ibarət olan tarixi kəndimiz - Baku TV

Ermənistanın indiki Geğarkunik vilayətində yerləşən Qaraqaya kəndi XIX əsrdən XX əsrin sonlarına qədər əsasən azərbaycanlıların yaşadığı yaşayış məntəqələrindən biri olub.

Kənd ən azı bir əsr ərzində Qaraqaya adını daşıyıb. 1991-ci ilin aprelində Ermənistanda Azərbaycan irsini erməniləşdirmək və məhv etmək siyasəti çərçivəsində kəndin adı dəyişdirilərək Dzoravank qoyulub.

Kənd 1995-ci ildən Ermənistan Respublikasının Geğarkunik vilayətinin tərkibindədir. XIX əsrin ikinci yarısında Qaraqaya Gölkənd kəndinin tabeliyində olan ərazi kimi qeyd edilib. Çar Rusiyası dövründə isə kənd Yelizavetpol quberniyasının Qazax qəzasına daxil olub.

Erməni mənbələrinin də istinad etdiyi çar dövrünə aid statistik məlumatlara görə, 1914-cü ilə qədər müxtəlif dövrlərdə Qaraqayada yalnız və ya əsasən azərbaycanlıların əcdadları yaşayıblar. 1897-ci ildə kəndin əhalisi 215 nəfər təşkil edib. Onların hamısı azərbaycanlıların əcdadları olub.