ABŞ-dən Azərbaycan və Ermənistana mühüm mesaj - Baku TV

“Sülh Birləşmiş Ştatlar, Ermənistan və Azərbaycan arasında hər üç ölkənin iqtisadi rifahına töhfə verəcək gücləndirilmiş əlaqələrə qapı açıb”.

Bu ifadələr 2025-ci il avqustun 8-də Vaşinqtonda keçirilən və Azərbaycanla Ermənistan arasında sülhün bərqərar olmasını təmin etmiş Sülh Sammitinin birinci ildönümü ilə bağlı ABŞ Dövlət katibi Marko Rubionun bəyanatında yer alıb.

O, iki ölkə arasında imzalanan bəyannamənin Cənubi Qafqazda onilliklər boyu davam edən münaqişəyə son qoyduğunu və “Beynəlxalq sülh və rifah naminə Tramp Marşrutu”nun başlanğıcı olduğunu qeyd edib.

“Ötən on iki ay ərzində Birləşmiş Ştatlar bu vədi tərəqqiyə çevirmək üçün Ermənistan və Azərbaycanla çiyin-çiyinə işləyib. Dəmir yollarını, avtomobil yollarını, enerji və rəqəmsal infrastrukturu müasirləşdirəcək multimodal tranzit marşrutu olan TRIPP Ermənistanda dəmir yolu üçün mühəndislik axtarışlarının artıq davam etməsi və Azərbaycanın Ermənistanla birləşəcək avtomobil və dəmir yolunun tikintisini yekunlaşdırmaq ərəfəsində olması ilə reallığa çevrilmək üzrədir”, – deyə bəyanatda vurğulanıb.

Rubio həmçinin Orta Dəhliz boyunca özəl sektorun investisiyalarını stimullaşdırmaq üçün ABŞ hökumətinin 201 milyon dollarlıq maliyyəsi ilə kapitallaşan Trans-Xəzər Müəssisə Fondunun fəaliyyətə başladığını açıqlayıb.

“Biz hər iki ölkəni son bir il ərzində nümayiş etdirdikləri cəsarət və uzaqgörənliyə görə təbrik edir və Cənubi Qafqazda möhkəm, davamlı sülh istiqamətində irəliləyişlərin davam etməsini səbirsizliklə gözləyirik”, – deyə sonda ABŞ Dövlət katibi əlavə edib.