Azərbaycan “Bir kəmər, bir yol”un kəsişmə nöqtəsi olacaq?

Azərbaycanla Çin arasında siyasi dialoq, iqtisadi tərəfdaşlıq əlaqələri daha da genişlənir.

Dövlətlərarası münasibətlərin formalaşmasında və inkişafında liderlərin şəxsi münasibətləri mühüm rol oynayır. İki ölkənin rəsmiləri arasında səfərlər intensivləşib, bütün sahələr üzrə danışıqlar və razılaşmalar dinamik xarakter alıb.

Prezident İlham Əliyevin son Çin səfəri bu əlaqələrin daha da sürətlə inkişaf etməsinə zəmin yaradıb. Azərbaycan və Çin arasında diplomatik münasibətlər qurulduqdan sonra hər iki ölkənin bir-birinin ərazi bütövlüyünü dəstəkləməsi qarşılıqlı etimad mühitinin yaranmasına səbəb olub.

İki ölkə arasında ticarət dövriyyəsi hər il daha da artır. Qeyri-neft sektorunda əməkdaşlıq var. Enerji sahəsində də birgə işlər görülür. Çin şirkətləri SOCAR ilə əməkdaşlığa xüsusi önəm verir. Gələcəkdə Xəzər dənizindəki enerji resurslarının Asiyaya nəqli ilə bağlı razılıq əldə edilə bilər. Bu isə Azərbaycanın Qərblə yanaşı, Şərqin də enerji təchizatında aparıcı rola malik olması ilə nəticələnəcək.

Çinin son zamanlar Qərb bazarına maraq göstərməsi Azərbaycanın tranzit əhəmiyyətini artırır. Rəsmi Bakı "Bir kəmər, bir yol" layihəsinə böyük maraq göstərir və bu proyekt ölkəmizə böyük imkanlar qazandırır. Azərbaycan Trans-Xəzər beynəlxalq nəqliyyat qovşağı və Bakı-Tbilisi-Qars dəmir yolu vasitəsi ilə Asiya ilə Avropa arasında mühüm logistika mərkəzinə çevrilib.

İki ölkə arasında mədəni-humanitar sahədə də əməkdaşlıq inkişaf edir. Azərbaycanda çin dili və mədəniyyətini təbliğ edən Konfutsi İnstitutu fəaliyyət göstərir. Çində təhsil alan Azərbaycan gənclərinin sayında da ciddi artım müşahidə edilir.

Azərbaycan və Çin arasında strateji əməkdaşlıq regional sabitlik və qlobal inteqrasiya baxımından xüsusi önəm daşıyır. Bütün bunlar gələcəkdə Azərbaycan-Çin əməkdaşlığının daha sıx xarakter alacağından xəbər verir.