Bu əməliyyat konkret olaraq cinayət əməlidir | Millət vəkilindən açıqlama

“Rusiya Federal Təhlükəsizlik Xidməti tərəfindən Yekaterinburqda yaşayan azərbaycanlılara qarşı həyata keçirilmiş, işgəncələr, qeyri-insani rəftar və hüquqazidd əməllərlə müşayiət olunan və nəhayət, qətllərlə nəticələnən bu əməliyyat istintaq hərəkəti kimi nə xarakterizə, nə də təqdim oluna bilər”.

Bunu millət vəkili Arzuxan Əlizadə Rusiya təhlükəsizlik orqanlarının Yekaterinburqda həyata keçirdiyi əməliyyat nəticəsində iki azərbaycanlının öldürülməsi, daha üç nəfərin isə reanimasiyaya yerləşdirilməsi ilə bağlı hadisəni şərh edərkən deyib.

“Bu, açıq şəkildə Rusiya xüsusi xidmət orqanlarının törətdiyi cinayət əməlləridir. Bu cür addımların arxasında isə dövlət strukturlarının yuxarı eşelonunda təmsil olunan şəxslərin sifarişləri dayanır. Təəssüf ki, rus şovinizmi uzun illərdir çiçəklənməkdədir. Bu siyasət əvvəllər qeyri-rəsmi qruplar vasitəsilə aparılırdısa, bu gün artıq rəsmi dövlət qurumlarının əli ilə həyata keçirilir”, ‒ deyə o bildirib.