Bu ölkələrin rəsmiləri şəhidlərimizlə bağlı paylaşımlar etdi

“Azərbaycanın müstəqilliyi və ərazi bütövlüyü uğrunda canlarını fəda etmiş şəhidlərin əziz xatirəsini dərin ehtiramla yad edir, qardaş ölkənin qazilərinə öz minnətdarlığımızı bildiririk”.

Bunu Türkiyənin Milli Müdafiə Nazirliyi sentyabrın 27-də Azərbaycanda qeyd olunan Anım Günü ilə əlaqədar yaydığı bəyanatda bildirib.

Milli Müdafiə Nazirliyi 44 günlük Vətən müharibəsində Azərbaycan övladlarının göstərdiyi qəhrəmanlıqları yüksək qiymətləndirib. Türkiyənin Azərbaycandakı səfirliyi də 27 Sentyabr – Anım Günü ilə əlaqədar paylaşım edib.

“Adları əbədi olaraq Zəfər tarixinə həkk olunmuş qardaş Azərbaycanın şəhidlərinin əziz xatirəsini dərin ehtiramla anırıq”, – deyə səfirliyin “X” hesabındakı paylaşımında qeyd olunub.

Həmçinin Böyük Britaniyanın Azərbaycandakı səfiri Fergus Auld 27 Sentyabr – Anım Günü ilə bağlı “X” hesabında paylaşım edib.

“27 Sentyabr – Anım Günündə müharibədə həyatını itirənləri hörmətlə anırıq. Regiona tezliklə sülh və əmin-amanlığın gəlməsini diləyirik”, – deyə səfirin paylaşımında qeyd edilib.