“Çəmbərək rayonundan zorla köçürülən 20 min soydaşımızın siyahısı hazırlanıb”

“Qərbi Azərbaycan Xronikası” layihəsi çərçivəsində növbəti veriliş efirə gedib.

Verilişin budəfəki müsahibi iqtisad elmləri doktoru, professor, sabiq maliyyə naziri Əvəz Ələkbərov olub.

Ə.Ələkbərov Cil sakinlərinin zəhmətkeşliyindən, doğmalığından danışıb.

Ötən əsrdə Qərbi Azərbaycanda törədilən soyqırımı və deportasiyalara toxunan professor Ə.Ələkbərov 1918-1920-ci illərdə silahlı daşnak-erməni quldur dəstələri tərəfindən Cil kəndində böyük qırğınlar törədildiyini dilə gətirib.

Alimin sözlərinə görə, sonrakı dövrlərdə də bölgədə yaşayan azərbaycanlılar təqib olunub, doğma el-obasından didərgin salınıblar. O buna nümunə kimi 1948-1953-cü illərin deportasiyasını misal çəkib.

Qeyd edib ki, Qərbi Azərbaycanın səfalı təbiətində yaşayan sakinləri yük vaqonlarında, hətta ev heyvanları ilə birlikdə Azərbaycanın Aran rayonlarına daşıyıblar:

"Bu məcburi köçə məruz qalan azərbaycanlıların böyük hissəsi iqlimi dəyişdiyinə, şəraitsizliyə və digər qeyri-insani rəftarlara görə vəfat edib. Deportasiya olunanların bəziləri məskunlaşdığı əraziyə zamanla uyğunlaşsalar da, bir qismi Stalinin ölümündən sonra təkrar ata-baba torpağına qayıdıb, yeni yurd-yuva salıblar. Lakin erməni millətçiləri 1980-ci illərin sonunda onları yenidən deportasiyaya məruz qoyublar".