Dünya mətbuatı Azərbaycanın antiterror tədbirlərindən nələr yazdı?

Azərbaycan Silahlı Qüvvələrinin Qarabağ bölgəsində həyata keçirdiyi lokal xarakterli antiterror tədbirləri xarici kütləvi informasiya vasitələrinin diqqət mərkəzindədir.

“akhbaralaan.net” saytı erməni separatçıların terror aktı nəticəsində Azərbaycan tərəfdən 4 polisin və mülki vətəndaşların həlak olmasından sonra antiterror tədbirlərinə start verdiyini yazıb.

“24.ae” portalında qeyd olunub ki, tədbirlər çərçivəsində və yüksək dəqiqliyə malik silahlardan istifadə etməklə Ermənistan Silahlı Qüvvələrinin bölmələrinin ön xətdə yerləşən mövqeləri və dərinlikdə yerləşən uzaqmənzilli atəş nöqtələri, eləcə də döyüş vasitələri və hərbi obyektləri yararsız hala salınıb.

“cnn.gr”, “liberal.gr”, “capital.gr”, “skai.gr” kimi yunan saytlarında da bildirilib ki, Azərbaycan Qarabağ bölgəsinin Rusiya sülhməramlı qüvvələrinin müvəqqəti nəzarətində olan ərazilərində antiterror tədbirlərinə başlayıb. Türkiyə mətbuatı da Qarabağdakı vəziyyət barədə son məlumatları paylaşıb.

Prezidentin köməkçisi Hikmət Hacıyevin son açıqlamalarına geniş yer verilib, Azərbaycanın Müdafiə Nazirliyinin məlumatları, antiterror tədbirlərinin gedişatı geniş işıqlandırılıb. “Hürriyet”, “Türkiye Gazetesi”, “Posta”, “AHABER”, “TRT Avaz” kimi media orqanlarının internet portallarında bildirilib ki, Azərbaycan Qarabağ üçün gözlənilən addımı atdı.

Qonşu ölkə Gürcüstanın “interpressnews.ge”, “kavkasiya.com”, “palitranews.ge”, “24news.ge”, “aktual.ge” kimi informasiya portallarının, eləcə də “maestro.tv”, “rustavi2” televiziya kanallarının yaydıqları xəbərlərdə oxuculara və tamaşaçılara Silahlı Qüvvələrimizin Qarabağ iqtisadi rayonunda antiterror tədbirlərinə başlaması barədə Azərbaycan, rus, ingilis və gürcü dillərində məlumatlar çatdırılıb.

Məqalələrdə həmçinin lokal antiterror tədbirləri ilə bağlı Azərbaycanın Müdafiə, Xarici İşlər Nazirliklərinin, Baş Prokurorluğun, Dövlət Təhlükəsizlik Xidmətinin yaydığı bəyanatlar, keçirilən brifinqlərdə səsləndirilən fikirlər də əksini tapıb.