Ermənistan Zəngəzur dəhlizinin açılmağını niyə istəmir? | Ekspertdən açıqlama

Amerika Birləşmiş Ştatları Dövlət katibinin köməkçisi Ceyms Obraynın ABŞ Konqresinin Nümayəndələr Palatasının Xarici Əlaqələr Komitəsində keçirilən dinləmələrdə Azərbaycan-Ermənistan münasibətləri ilə bağlı səsləndirdiyi fikirlər diqqətçəkici idi.

Belə ki, C.Obrayn bir neçə istiqamət üzrə mühüm məsələlərə toxunub. Onlardan biri də nəqliyyat dəhlizləri ilə bağlı olan məqamdır.

C.Obrayn bildirib ki, Bakı ilə İrəvan arasında sülh Mərkəzi Asiyadan məhsul axını üçün alternativ yol açacaq. Bu marşrut Azərbaycan, Ermənistan və Türkiyədən keçə bilər.

Ekspertlərin sözlərinə görə, C.Obraynın Bakıya səfəri ərəfəsində məlum fikirləri səsləndirməsi ABŞ-nin Zəngəzur dəhlizinin açılmasında maraqlı olduğunu göstərir.

Siyasi şərhçi Oqtay Qasımov qeyd edib ki, Amerika Birləşmiş Ştatları artıq Zəngəzur dəhlizinin açılması ilə bağlı öz mövqeyini bildirir və Ermənistan da bu istiqamətdə üzərinə düşən vəzifələri yerinə yetirməlidir:

“Bu dəhlizin açılması ilə bağlı müəyyən fikir ayrılıqları var. Belə ki, Azərbaycan məhz üçtərəfli bəyanatda qeyd olunduğu kimi, Ermənistandan Azərbaycan vətəndaşlarının Naxçıvana və geriyə sərbəst, maneəsiz gedişinin təmin olunmasını tələb edir.

Ermənistan hələlik bu məsələyə tam şəkildə razılıq verməyib. O baxımdan bu məsələ bir daha Bakı görüşündə müzakirə olunacaq və Azərbaycanın mövqeyi təkrar olaraq ABŞ-nin diqqətinə çatdırılacaq”.