Ermənistandan gələn "ərzaqlar" həftələrdir xarab olmur

Ermənistanın Qarabağda yaşayan ermənilərə göndərdiyi içərisində həm “tibbi ləvazimatlar”, həm də “qida məhsulları” olan 400 tondan ibarət yük artıq bir aya yaxındır ki, şərti sərhəddə gözləmə mövqeyindədir.

Rəsmi İrəvan növbəti dəfə beynəlxalq qanunlara qarşı çıxaraq Azərbaycanın ərazi bütövlüyü və suverenliyinə hörmətsizlik nümayiş etdirir, eləcə də rəsmi Bakının təklif etdiyi bütün alternativ marşrutları qəbul etmir, hətta gətirilən yüklərin xarab olacağı ilə bağlı dünyaya çağırış edir.

Belə olan halda maraqlı sual ortaya çıxır: sözügedən yük maşınlarındakı məhsulların aqibəti necə olub?

Bununla bağlı bir neçə variant var: birincisi, isti havada bu müddət ərzində sözügedən yüklər çoxdan xarab olub. İkincisi, qida məhsullarını daşıyan avtomobillər adətən soyuducu sistemlə təmin edilir və həmin sistemin çalışması üçün yanacaq lazım olur. Müşahidələr isə göstərir ki, bu müddətdə yük maşınlarına heç bir yanacaq təminatı olmayıb.

Belə çıxır ki, həmin avtomobillərdəki məhsullar ya həqiqətən xarab olub, ya tamamilə boşdur, yaxud da ümumiyyətlə, qida məhsulları deyil, digər məhsullar daşınır.