“Gərginliyin azalması iqtisadi nəticələr verməyə başlayıb”

Azərbaycan 2025-ci ilin dekabrından Ermənistana üç dəfə neft məhsulları tədarükü həyata keçirib, bu da iki ölkə arasında birbaşa ticarətin və iqtisadi qarşılıqlı fəaliyyətin başlanğıcının siqnalıdır.

"Moody`s" beynəlxalq reytinq agentliyinin hesabatında bildirilir ki, Ermənistanın Azərbaycanla neft və neft məhsullarının alınması ilə bağlı danışıqları davam edir.

Hesabat müəlliflərinin fikrincə, danışıqlar uğurla başa çatdığı təqdirdə onilliklər boyu davam edən izolyasiya dövründən sonra struktur dəyişilə bilər və Ermənistanın Rusiya yanacağından asılılığı azala bilər.

"Geosiyasi gərginliyin azalması regional bağlantını və ticarəti gücləndirə bilər. Mart ayında sülh müqaviləsi şərtlərinin razılaşdırılmasından sonra Azərbaycan və Ermənistan arasında ikitərəfli münasibətlərdə konstruktiv irəliləyiş əldə olunub. İki ölkənin liderləri arasındakı diplomatik əlaqələr daha sıx olub. Həmçinin ABŞ-nin vasitəçiliyi ilə 2025-ci ilin avqustunda imzalanmış birgə bəyanat ərazi iddialarından imtinanı, sərhədin delimitasiyasını sürətləndirməyi və nəqliyyat marşrutlarını bərpa etməyi nəzərdə tutur", – deyə agentlik qeyd edib.

"Moody`s"in qiymətləndirməsinə görə, iki ölkə arasında gərginliyin azalması hiss olunan iqtisadi nəticələr verməyə başlayıb.

"Ötən ilin oktyabrında Azərbaycan öz ərazisi vasitəsilə Ermənistana yük tranzitinə qoyulan məhdudiyyətləri aradan qaldırıb ki, bu da iqtisadi əlaqələrin bərpası potensialını nümayiş etdirir", – deyə hesabatda qeyd olunub.

Cari ilin yanvarında ABŞ və Ermənistan "Tramp Marşrutu" layihəsinin həyata keçirilməsi çərçivəsini rəsmiləşdiriblər. Bu təşəbbüs regional ticarətin stimullaşdırılmasına, nəqliyyat əlaqələrinin genişləndirilməsinə, Mərkəzi Asiya və Xəzər regionunu Avropa ilə əlaqələndirən yeni marşrutların yaradılmasına yönəlib.