Gürcü ekspertlər COP29-un əhəmiyyətindən danışdı

“Dünyanın dörd bir yanından onminlərlə şəxsin iştirakı ilə baş tutan COP29-un Azərbaycanda keçirilməsi ölkənizin bugünkü nüfuzunun göstəricisidir”.

Bu barədə gürcü politoloq və ekspertlər Baku TV-yə verdikləri müsahibələrində bildiriblər.

Onlar Azərbaycanın Prezident İlham Əliyevin rəhbərliyi ilə böyük uğurlara imza atdığını deyiblər.

“Azərbaycanda keçirilən iqlim dəyişikliyinə həsr edilmiş tədbir olduqca yüksək səviyyədə təşkil edildi. Burada mühüm problemli məsələlər müzakirə olundu. Bu məsələlər yalnız region üçün deyil, bütövlükdə dünya üçün böyük əhəmiyyət kəsb edir. COP29-un keçirilməsi Azərbaycanın bugünkü nüfuzunun göstəricisidir. Azərbaycan İlham Əliyevin rəhbərliyi ilə böyük uğurlara imza atır. Bu cür beynəlxalq tədbirlər bölgəmizdə sabitliyin, sülhün qorunmasına təkan verəcək. İqlimlə bağlı müzakirələrə çıxarılan problemli məsələlər də öz həllini tapacaq”, – politoloq Badri Naçkebia qeyd edib.

Suxumi Dövlət Universitetinin professoru İndira Dzaqania isə Azərbaycanın yüksələn nüfuzunun Gürcüstan üçün də önəmli olduğunu diqqətə çatdırıb:

“Azərbaycanla Gürcüstan arasında tarixi dostluq əlaqələri mövcuddur. Bu əlaqələr bu gün heç vaxt olmadığı qədər yüksək səviyyəyə qalxıb. Hər kəs bilir ki, strateji tərəfdaşıq və bu tərəfdaşlığımız bütün sahələrdə yüksələn xətt üzrə inkişaf edir. Ölkələrimiz hər zaman beynəlxalq arenada bir-birlərini dəstəkləyir. Azərbaycanın artan qüdrəti, yüksələn nüfuzu isə Gürcüstan üçün də önəmlidir və biz hər zaman bunu dəstəkləyirik”.

Gürcü politoloqlar həmçinin Azərbaycanın son illərdə ev sahibliyi etdiyi bir sıra mötəbər, beynəlxalq tədbirlərin Cənubi Qafqazın inkişafına, bölgəyə diqqətin artmasına gətirib çıxardığını da vurğulayıblar.