Gürcüstan və Azərbaycan arasında dəmir yolu ilə sərnişindaşıma xidməti təxirə salındı?

“Bizdən nə danışırlar?” verilişinin yeni buraxılışı yayımlanıb.

Verilişdə bildirilib ki, Rusiyanın “Vestnik Kavkaza” nəşri diqqətə çatdırıb ki, Gürcüstan və Azərbaycan arasında dəmir yolu ilə sərnişindaşımaların bərpası təxirə salınıb.

Bildirilib ki, Bakı və Tbilisi arasında sərnişin qatarının bərpası üzrə işlər davam edir, lakin sərnişindaşımaların bərpa olunacağı tarix daha sonra açıqlanacaq.

“Suriyada xarici qüvvələrin yerləşdirilməsi ilə bağlı istənilən dəyişikliyin qırmızı xətt olduğunu Azərbaycanda Türkiyə tərəfinə açıqladıq”.

Bu barədə “The Times of Israel” nəşri İsrail rəsmisinə istinadən məlumat yayıb.

“Dünən Azərbaycanda İsrail və Türkiyə nümayəndələri arasında görüş keçirilib. Görüşdə İsrail birmənalı şəkildə bildirib ki, Suriyada xarici qüvvələrin yerləşdirilməsində hər hansı dəyişiklik, xüsusən də Palmira bölgəsində türk bazalarının yaradılması qırmızı xətdir”, − deyə mənbədə qeyd olunub.

Ukraynanın aparıcı kütləvi informasiya vasitələri ADA Universitetində Prezident İlham Əliyevin “Yeni dünya nizamına doğru” mövzusunda beynəlxalq forumda çıxışına geniş yer ayırıb.

“RBK-Ukrayna” nəşri Prezident İlham Əliyevin Ukrayna-Rusiya müharibəsinin tənzimlənməsinə dair fikirlərini işıqlandırıb.

Məqalədə dövlət başçısının çıxışına istinadla yazılıb ki, real dünyada müharibələr yalnız tərəflərdən biri təslim aktı imzaladıqdan sonra sona çatır.