II Qlobal Media Forumunun açılış mərasimində dövlət başçımızın çıxışı dünyada əks-səda doğurdu

"Bizdən nə danışırlar?" verilişinin yeni buraxılışı efirə gedib.

Verilişdə bildirilib ki, Azərbaycanın beynəlxalq aləmdəki rolu, apardığı çoxşaxəli xarici siyasət xətti və qlobal çapda hiss olunan nüfuzu ötən həftə boyunca da xarici media resurslarında müzakirələrə səbəb olub.

Rusiyanın TASS informasiya agentliyi Prezident İlham Əliyevin iyulun 20-də “Yalan məlumatların ifşası: Dezinformasiyaya qarşı mübarizə” mövzusunda 2-ci Şuşa Qlobal Media Forumunun açılış mərasimində Avropaya qaz təchizatı ilə bağlı bu fikrini sitat olaraq gətirib:

“Bu gün Avropanın bizim qaza böyük ehtiyacı var. Mən nəyə görə dedim ki, gəlin riyakarlığa son qoyaq?! Bir tərəfdən Avropa bizdən xahiş edir ki, hasilatı artıraq və onu Avropaya nəql edək. Çünki onların buna ciddi ehtiyacı var. Digər tərəfdən onlar bunu maliyyələşdirmirlər”.

Türkiyənin “Haberler.com” saytı isə Azərbaycan Prezidentinin İsrail-Fələstin münaqişəsi ilə bağlı fikirlərinə diqqət çəkib.

Məqalədə qeyd olunub ki, Azərbaycanın dövlət başçısı Yaxın Şərqdə sülhün təmin edilməsi baxımından 2 dövlətli həll yolunun yeganə çıxış yolu olduğunu diqqətə çatdırıb.

Gürcüstanın “Aktual.ge” nəşri “İlham Əliyev: “Biz nə işğalı, nə verdiyimiz qurbanları, nə də qələbəmizi heç zaman unutmayacağıq” başlıqlı xəbər dərc edib.

Məqalədə dövlət başçısının xüsusilə Cənubi Qafqaz regionunun inkişafı, sülh prosesi, Azərbaycanla bağlı həqiqətlərin düzgün, qərəzsiz işıqlandırılmasının vacibliyi barədə fikirləri əksini tapıb.

Mənbə Prezident İlham Əliyevin bu fikrini sitat gətirib: “Biz heç bir zaman nə işğalı, nə fəsadları, nə verdiyimiz qurbanları, nə böyük Qələbəmizi unutmayacağıq. Biz və bizim gələcək nəsillərimiz bu Qələbə ilə fəxr edəcək”.

Böyük Britaniyanın “Reuters” xəbər portalı “Azərbaycan Prezidenti Fransa ərazilərinin müstəqilliyini təmin etməkdə kömək edəcəyinə söz verib” başlıqlı məqalə dərc edib.

Xəbərdə vurğulanıb ki, Prezident İlham Əliyev kolonializmdən əziyyət çəkən bütün xalqları dəstəkləməyə davam edəcəyini, Qəmər adaları, Mayot adası kimi ərazilərin hələ də kolonial idarəçilik altında olduqlarını deyib.