İlham Əliyev hərbi qulluqçulara verilən güzəştli ipoteka ilə bağlı fərman imzaladı

Prezident İlham Əliyev “Müdafiə Nazirliyinin strukturuna daxil olan Milli Müdafiə Universitetinin tabeliyindəki xüsusi təyinatlı təhsil müəssisələrində təhsil almış hərbi qulluqçulara verilən güzəştli ipoteka kreditlərinə dövlət tərəfindən maliyyə dəstəyi göstərilməsi Qaydası”nı təsdiq edib.

Dövlət başçısı bununla bağlı yeni Fərman imzalayıb, eləcə də bəzi fərmanlarında dəyişiklik edib.

Dəyişikliklərə əsasən, Müdafiə Nazirliyi hərbi qulluqçulara verilən güzəştli ipoteka kreditlərinə dövlət tərəfindən maliyyə dəstəyi göstərilməsi üzrə Nazirlik bir sıra istifadə imkanlarına malikdir.

Bunlara maliyyə dəstəyi göstərilməsi üçün tələb olunan məlumatları almaq, maliyyə dəstəyi göstərilməsinə dair müvafiq qərar qəbul edildiyi gün bunu ipoteka krediti almaq istəyən şəxsə bildirmək, maliyyə dəstəyi göstərilməsi dayandırıldıqda, yaxud yenidən bərpa edildikdə İpoteka və Kredit Zəmanət Fonduna, eləcə də müvəkkil banka məlumat vermək, elektron sistem üzrə aidiyyəti statistik məlumatlardan və hesabatlardan istifadə etmək daxildir.

Müvafiq dövlət qurumlarına fərmandan irəli gələn məsələlərin həlli üçün zəruri tədbirlərin görülməsi tapşırılıb.