İlham Əliyev Kişineuda Moldovanın Baş naziri ilə görüşüb

Mayın 31-də Prezident İlham Əliyev Kişineuda Moldovanın Baş naziri Dorin Reçanla görüşüb.

Azərbaycan Prezidenti ilə görüşdən məmnunluğunu bildirən Moldovanın Baş naziri dövlət başçısına “Avropa Siyasi Birliyi” nin Zirvə toplantısında iştirakına görə minnətdarlığını ifadə edib. Dorin Reçan Müstəqillik Günü və ulu öndər Heydər Əliyevin anadan olmasının 100 illiyi münasibətilə Azərbaycan Prezidentini təbrik edib. O, ümummilli liderin nümunəvi şəxsiyyət olduğunu vurğulayıb.

İlham Əliyev “Avropa Siyasi Birliyi” nin Zirvə toplantısının Moldovada keçirilməsi münasibətilə təbriklərini çatdırıb. Baş nazir Azərbaycanın Moldovaya göstərdiyi dəstəyə görə təşəkkürünü ifadə edib. Söhbət zamanı ölkələrimiz arasında münasibətlərin yüksək səviyyədə olduğu, Azərbaycanla Moldova arasında iqtisadi-ticari əlaqələrin daha da inkişaf etdirilməsi üçün geniş imkanların olduğu, hazırkı ticarət dövriyyəsinin qənaətbəxş olmadığı qeyd edilib.

Ticarət dövriyyəsinin şaxələndirilməsinin vacibliyi diqqətə çatdırılıb. Bu xüsusda hökumətlərarası komissiyanın fəaliyyətinin daha da intensivləşdirilməsinin əhəmiyyəti vurğulanıb.

Söhbət zamanı Azərbaycanla Moldova arasında kənd təsərrüfatı, elektroenergetika, sərmayələr, infrastruktur layihələri ilə bağlı və qarşılıqlı maraq doğuran digər sahələrdə əməkdaşlıq üçün geniş imkanların olduğu qeyd edilib.

Moldovanın üzümçülük və şərabçılıq sahəsində geniş təcrübəsinin, Azərbaycanın da bu sahədə zəngin ənənələrinin olduğu vurğulanıb. Bu istiqamətdə əməkdaşlığın genişləndirilməsi üçün imkanların mövcud olduğu bildirilib.