İlham Əliyevin fəaliyyətinə verilən yüksək dəyər | Çingiz Aytmatovun ev-muzeyindən görüntülər

Noyabrın 5-də Bişkekdə Prezident İlham Əliyevə “Çingiz Aytmatov” ordeni təqdim edilib.

Dövlət başçısı görkəmli qırğız yazıçısı Çingiz Aytmatovun ev-muzeyinə gəlib.

Prezident İlham Əliyev əvvəlcə ev-muzeyi ilə tanış olub. Məlumat verilib ki, muzey Bişkek yaxınlığındakı “Ala-Arça” dövlət iqamətgahında – 1986-cı ildən yazıçının ömrünün son 20 ilini yaşadığı evdə yerləşir. Qırğız xalqının böyük oğlunun vəfatından sonra onun həyat yoldaşı Mariya Aytmatova və oğlu Eldar ailəsi ilə burada yaşayıblar.

Ev-muzeyi Çingiz Aytmatovun həyat yoldaşı Mariya Urmatovna, övladları Eldar və Şirinin təşəbbüsü ilə 2014-cü il dekabrın 12-də açılıb.

Çingiz Aytmatovun kiçik oğlu Eldar yazıçının hələ sağlığında evdə hökm sürmüş bütün ab-havanı və şəraiti ən xırda detala qədər qoruyub saxlamağa çalışıb. Ev-muzeyində yazıçının şəxsi əşyaları, əlyazmaları və çoxsaylı mükafatları qorunub saxlanılır. İkinci mərtəbədə onun kabineti, yataq otağı və kitabxana yerləşir.

Evin ikinci hissəsində Eldar Aytmatov və ailəsi yaşayır. Mədəni-maarif fəaliyyəti ilə məşğul olan Çingiz Aytmatov Beynəlxalq Fondu da burada yerləşir. Fond 2000-ci ildə yazıçının özü tərəfindən təsis edilib, indi onun övladları tərəfindən idarə olunur.

Prezident İlham Əliyev ev-muzeyinin xatirə kitabına ürək sözlərini yazıb.

Daha sonra Azərbaycanın dövlət başçısına “Çingiz Aytmatov” ordeninin təqdim edilməsi mərasimi olub. Prezident İlham Əliyev fəaliyyətinə verilən qiymətə görə Çingiz Aytmatov Fonduna, həmçinin böyük yazıçının ailə üzvlərinə və yaxınlarına təşəkkür edib.