Kadırovu özündən çıxaracaq qərar | Təyyarə qəzası istintaqını kim aparacaq?

Rusiya Prezidenti Vladimir Putin ölkənin İstintaq Komitəsinin sədri Aleksandr Bastrıkini Çeçenistana göndərib. A.Bastrıkin artıq Qroznıda əməliyyat müşavirəsi keçirilib.

Azərbaycan təyyarəsinin vurulması ilə bağlı istintaq Qroznıda Rusiyanın “baş təhqiqatçısı”nın rəhbərliyi altında davam edir.

Məsələnin ən diqqətçəkən tərəfi budur ki, Aleksandr Bastrıkin və Çeçenistan rəhbəri Ramzan Kadırov düşmən münasibətindirlər. Ramzan Kadırov Rusiya İstintaq Komitəsinin rəhbəri Bastrıkinin Rusiyada terror aktlarını törədənlərin islamçılar olması ilə bağlı açıqlamasını şərh edərkən onun ünvanına olduqca təhqiramiz ifadələr işlətmişdi.

R.Kadırov bildirirdi ki, Rusiya İstintaq Komitəsi və onun rəhbəri çeçenlər başda olmaqla bütün müsəlmanlara qarşı düşmənçilik edir.

Ümumiyyətlə, Rusiya Daxili İşlər naziri Vladimir Kolokoltsev və Baş İstintaq Komitəsinin sədri Aleksandr Bastrıkin Kadırovun media qurumlarında ən çox tənqid edilən şəxslərdir.

Çeçenistan rəhbərinin Kreml tərəfindən ciddi şəkildə müdafiə edilməsi onu qarşı tərəfin hücumundan hər zaman qoruyub.

Rusiya istintaq komitəsinin rəhbəri ilk dəfə R.Kadırovun ən azı ətrafını zərərsizləşdirmək üçün şans əldə edib.

Hazırda Çeçenistan rəhbərliyi Rusiya dövləti tərəfindən başladılan istintaq prossesinə müdaxilə edə bilmir. Şübhəsiz ki, Baş İstintaq İdarəsinin rəisi əlində olan imkanlarla çalışacaq ki, Ramzan Kadırovun gücünü zəiflətsin. Ancaq Kremlin yenə Çeçenistan rəhbərini müdafiə etməsi vəziyyəti dəyişə bilər.

Qroznıda gözlər hazırda Moskvaya zillənib. R.Kadırovun düşməninin geniş səlahiyyətlərlə Çeçenistana göndərilməsi göstərir ki, artıq Rusiya rəhbərliyi də bu “əyalət rəhbəri”nin özbaşınalıqlarından bezib.