Nizami rayonunda keçirilən konfransda suverenliyin əhəmiyyətindən danışıldı - Baku TV

Nizami Rayon İcra Hakimiyyəti və Yeni Azərbaycan Partiyasının rayon təşkilatının birgə təşkilatçılığı ilə Dövlət Suverenliyi Gününə həsr olunmuş konfrans keçirilib.

“Zəfərlə ucalan Azərbaycan və suverenlikdən doğan güc” mövzusunda keçirilən tədbirdə Milli Məclisin deputatları, rayon ictimaiyyətinin nümayəndələri, şəhid ailələrinin üzvləri, qazilər və gənclər iştirak ediblər.

Tədbir Dövlət Himninin səsləndirilməsi ilə başlayıb. Daha sonra Ulu Öndər Heydər Əliyevin və Azərbaycanın ərazi bütövlüyü və suverenliyi uğrunda şəhid olanların xatirəsi 1 dəqiqəlik sükutla yad edilib.

Konfransda Dövlət Suverenliyi Gününə həsr olunmuş videoçarx nümayiş etdirilib, müxtəlif çıxışlar dinlənilib. Çıxışlarda 2023-cü ilin sentyabrında keçirilən lokal xarakterli antiterror tədbirlərinin Azərbaycanın suverenliyinin bütün ölkə ərazisində bərpası ilə nəticələndiyi vurğulanıb. Bildirilib ki, həmin hadisələrdən sonra Azərbaycan tarixində yeni mərhələ başlayıb və ölkənin ərazi bütövlüyünün tam bərpası regionda təhlükəsizlik məsələlərinə də təsir göstərib.

Tədbirdə 20 Sentyabrın Dövlət Suverenliyi Günü kimi təsis edilməsinin əhəmiyyətindən də danışılıb. Qeyd olunub ki, bu tarix Azərbaycanın Zəfər tarixinin mühüm səhifələrindən biridir. Çıxışlarda suverenliyin yalnız siyasi anlayış deyil, həm də milli dövlətçilik, kimlik və gələcək nəsillər üçün mühüm dəyər olduğu vurğulanıb.