Onlardan kim xahiş edib ki... | Deputat Qərb dairələrinin əməllərini tənqid etdi

"İnsan haqlarının beynəlxalq müdafiəsi mexanizmləri faktiki olaraq ikili standartlar üzərində qurulub. Hamının qanun və məhkəmə qarşısında bərabərliyindən dəm vuranlar konkret əməlinə görə barəsində cinayət təqibi başlanmış ayrı-ayrı şəxslərin ətrafında istintaqı şouya çevirmək cəhdlərindən əl çəkmirlər, yaxud heç bir dəlil, sübut olmadan terrorçu elan etdiyi şəxsləri və toplumları sərhədlərindən min kilometrlərlə kənarda yerlə-yeksan edənlər Azərbaycandan terrorçuların azadlığını tələb edirlər".

Bunu Milli Məclisin martın 7-də keçirilən plenar iclasında deputat Bəhruz Məhərrəmov deyib.

O bildirib ki, Xocalı soyqırımına, məruz qaldığımız etnik təmizləməyə, 1 milyondan artıq insanın məhrumiyyətlərinə, təməl haqlarından xali olduğu situasiyaya göz yuman BMT-nin İnsan Hüquqları üzrə Ali Komissarlığı əməlləri təkzibedilməz sübutlarla təsdiq olunan terrorçuların, separatçıların adını qlobal mediaya "qanunsuz saxlanılmış etnik ermənilər" şəklində servis edərək cinayətlərə ortaq olur:

"Bu gün Azərbaycanda bəzi xarici ölkələrin səfirləri özlərini ombudsman kimi aparırlar, kim xahiş edib onlardan bu yersiz xidməti göstərsinlər? Hər kəs, o cümlədən Azərbaycanda insanların hüquqları barədə "narahatlıq" yaşayan ölkələr yaxşı olar ki, öz gözlərində tiri görsünlər".