Pakistanda ordu konvoyuna hücum olub

Pakistanda ordu konvoyuna hücum edilib, 12 əsgər həlak olub.

Bu barədə Pakistanın Təhlükəsizlik Xidmətindən məlumat verilib.

Hadisə ilə bağlı Azərbaycanın müdafiə naziri general-polkovnik Zakir Həsənov Pakistanın Birləşmiş Qərargah Rəisləri Komitəsinin sədri general Sahir Şamşad Mirzaya başsağlığı ünvanlayıb. Nazir həlak olanlara və onların yaxınlarına səbir diləyib.

Qeyd edək ki, hadisə Pakistanın şimal-qərbində, Əfqanıstan sərhədinə yaxın olan Cənubi Vəziristan bölgəsində baş verib. Hücuma görə “Pakistan Talibanı Hərəkatı” məsuliyyəti öz üzərinə götürüb. Hadisə yerində olan təhlükəsizlik rəsmisi hücum edənlərin konvoyun silahlarını ələ keçirdiklərini bildirib.

Analitiklər bildirirlər ki, hökumətin qəbilələrin yaşadığı ərazilərdə antiterror əməliyyatlarının gücləndirildiyini bəyan etməsinə baxmayaraq, qruplaşma son aylarda hücumlarını artırıb. Rəsmi İslamabad bu qruplaşmanın Əfqanıstanda “Taliban” hökuməti tərəfindən himayə olunduğunu iddia edir. Əfqanıstan hökuməti isə bu iddianı rədd edir.