Putin "Vaqner"in qiyamını vətəndaş müharibəsi adlandırdı

Rusiya Prezidenti Vladimir Putin silahlı qiyamı dayandırmağa kömək edən hərbçilər və hüquq-mühafizə orqanlarının əməkdaşları qarşısında çıxış edib.

Rusiya dövlət başçısı ilə Kremlin Sobornıy meydanında keçirilən görüşdə güc stukturlarının əməkdaşları iştirak ediblər. O, çıxışı zamanı “Vaqner” xüsusi hərbi şirkətinin rəhbəri Yevgeni Priqojinin iyunun 24-də başlatdığı silahlı qiyamı vətəndaş müharibəsi kimi qiymətləndirib.

"Ölkə üçün çətin bir vaxtda Rusiya Federasiyasının hərbçiləri iğtişaşların qarşısını alıblar, hansı ki iğtişaşın nəticəsi xaos olacaqdı. Hərbçilər və hüquq-mühafizə orqanları faktiki olaraq vətəndaş müharibəsini dayandırdılar. Qiyam zamanı güc strukturları mühüm obyektlərin təhlükəsizliyini, hərbçilərin arxa cəbhəsinin gücünü təmin edib. Təhlükəsizlik qüvvələrinin çevik və dəqiq işi mülki insanlar arasında itkilərin qarşısını almağa imkan verib", – deyə V.Putin bildirib.

Rusiya lideri qiyam zamanı həlak olan pilotların xatirəsinin bir dəqiqəlik sükutla yad edilməsini təklif edib. Bildirib ki, pilotlar öz vəzifələrini şərəflə yerinə yetiriblər.

O qeyd edib ki, Rusiya Federasiyası xüsusi əməliyyat zonasından döyüş hissələrini çıxarmaq məcburiyyətində qalmayıb. V.Putin onu da vurğulayıb ki, insanlar, ordu, xalq qiyamçıların yanında olmayıb.