Qərbi azərbaycanlıların qayıdışı erməniləri xilas edəcək | QƏRBİ AZƏRBAYCAN XRONİKASI

“Qərbi Azərbaycan Xronikası” layihəsi çərçivəsində növbəti veriliş efirə gedib.

Jurnalist Rufik İsmayılovun budəfəki müsahibi Milli Məclisin deputatı Sahib Alıyev olub.

O, Qərbi Azərbaycanda doğulub boya-başa çatdığı Göyçə mahalı, Basarkeçər rayonu, Aşağı Şorca kəndindən söhbət açıb. Millət vəkili bildirib ki, dünyaya göz açdığı yaşayış məntəqəsi onun üçün bir dünyadır: “Qərbi Azərbaycan, o cümlədən Göyçə mahalı, Aşağı Şorca kəndi mənim üçün gözəl təbiəti olan mistik bir məkan, əvəzedilməz dünyadır. Göyçə mahalı eynən Altay kimi energetikası yüksək olan tarixi yurd yerimizdir”.

Deputat S.Alıyev el-obasının, qohum-əqrəbasının sadəcə Azərbaycana deyil, xarici ölkələrə pərən-pərən düşdüyünü deyib: “Mənim nəslim dəfələrlə deportasiyalarla üzləşib. Sonuncu deportasiyada da ailə üzvlərim böyük çətinliklərlə üzləşib, sarsıntılar yaşayıb. Mən o zaman Moskvada universitetdə jurnalistika ixtisası üzrə ali təhsil alırdım. Bəzən o günləri düşünəndə özümü günahkar bilirəm ki, nəyə görə ailəmin çətin vaxtlarında onların yanında ola bilməmişəm, onlara mənəvi dəstək göstərə bilməmişəm. Amma reallıqda bütün bu olanların baiskarı və günahkarı SSRİ-nin o zamankı rəhbəri Mixail Qorbaçov idi. Ona görə də daim onu lənətlə xatırlayıram”.

S.Alıyev bildirib ki, Qarabağdakı haylar bizim ərazimizdə qalıb yaşasalar da, yaşamasalar da, qərbi azərbaycanlılar öz torpaqlarına qayıdacaqlar: “Vətəndaşlarımızın qayıdışı, onların hüquq və təhlükəsizliyinin təmin olunması başlıca şərtdir. Hazırda Ermənistanda xəstə təfəkkürlü bir cəmiyyət var. Sağlam düşünənlər onlar arasında çox azlıq təşkil edirlər və reallığa uyğun danışmağa, hansısa addımlar atmağa ehtiyat edirlər. Amma bilməlidirlər ki, qərbi azərbaycanlıların qayıdışı erməniləri üzləşdikləri rəzil durumdan xilas edəcək”.