Qusmanın bu çıxışı Mironovu özündən çıxardı | Qalmaqallı xəbərin detalları

Rusiya Ədalətli Rusiya Partiyasının sədri Sergey Mironov TASS-ın baş direktorunun keçmiş birinci müavini Mixail Qusmanın dövlət mükafatlarından məhrum edilməsini istəyib.

Bu barədə S.Mironov özünün “Telegram” kanalında yazıb.

“Rusiya Konstitusiyasının 89-cu maddəsinə dəyişiklik etmək və Rusiya Prezidentinə təkcə dövlət mükafatları vermək deyil, həm də onları ləğv etmək hüququ vermək lazımdır. Bu gün bu, yalnız ağır və ya xüsusilə ağır cinayət törətməyə görə məhkəmə qərarı ilə mümkündür.

Bəs bir şəxs cinayət deyil, dövlətə xəyanətlə həmsərhəd bir hərəkət edibsə, nə etməli? İndi TASS-ın baş direktorunun keçmiş birinci müavini M.Qusman Azərbaycanda açıq-aşkar anti-Rusiya ruhunun hökm sürdüyü və Prezident İlham Əliyevin Ukraynanı işğala qarşı mübarizəyə çağırdığı forumda onun unikal xarici siyasətini tərifləyib.

Azərbaycanın anti-Rusiya siyasətini unikal hesab edən şəxs Rusiya mükafatlarını ala bilərmi? Xeyr. Belə bir insan məhkəmə tərəfindən deyil, vicdanına görə Rusiya Prezidentinin qərarı ilə dövlət mükafatlarından məhrum edilməlidir”, ‒ o bildirib.

Qeyd edək ki, S.Mironov ictimaiyyətdə anti-Azərbaycan bəyanatları ilə tanınır.