Sakinlər səhv seçim edərsə, nə baş verəcək? | Gürcüstanda seçkilərə son bir gün

25 oktyabr Gürcüstanda sükut günüdür.

Ölkə əhalisi bir gün sonra növbəti parlament seçkilərində səs verəcək.

Baku TV qonşu dövlətin Cənubi Qafqaz ölkələri arasında tutacağı yerlə bağlı Gürcüstan vətəndaşlarından müxtəlif təbəqələrin fikirlərini öyrənməyə çalışıb.

Ölkənin 3,7 milyon əhalisinin müəyyən bir hissəsi Avropa İttifaqı və NATO-ya üzv olmaqla Qərbə yaxınlaşmanı, digər hissəsi isə Rusiya ilə münasibətlərin inkişafına üstünlük verən “Gürcü Arzusu”nun siyasətini dəstəkləyir, Ukraynanın taleyinin Gürcüstanda təkrarlanmasından ehtiyat edirlər.

75 yaşlı Oleq Maçavarianinin evi 2008-ci ildə separatçı regionlar – Cənubi Osetiya və Abxaziya uğrunda 5 gün davam edən və Gürcüstanın məğlubiyyəti ilə başa çatan müharibə meydanının yaxınlığındadır.

Onun sözlərinə görə, səhv seçim olsa, Gürcüstan müharibənin içinə daxil olacaq:

“Qəti şəkildə hazırkı Gürcüstana, cənab Bidzina İvanişviliyə inanırıq. Müxalifət qalib gəlsə, müharibəyə cəlb ediləcəyik. Biz artıq 2008-ci ildə bir müharibədən keçmişik, başqa müharibə olsa, iqtisadi inkişafımız olmayacaq, sülh olmayacaq. 1990-cı illərə geri dönəcəyik, gürcü xalqı buna imkan verməyəcək”.

Qeyd edək ki, Gürcüstanda parlament seçkiləri oktyabrın 26-da keçiriləcək. Artıq 12 ildir hakimiyyətdə olan “Gürcü Arzusu” partiyası 4-cü dəfə qalib gəlməyə çalışacaq. “Vahid Milli Hərəkat” partiyası onun əsas rəqibi hesab olunur. Ən çox səs toplayan partiya hökuməti quracaq, baş nazir namizədini irəli sürəcək.