Saxlanılan Ermənistan vətəndaşı Azərbaycana təşəkkür etdi

İnsan Hüquqları üzrə Müvəkkil Səbinə Əliyevanın tapşırığı əsasında Milli Preventiv Qrupun üzvləri istintaq təcridxanasına növbəti ziyarət gerçəkləşdiriblər.

Ziyarət çərçivəsində istintaq təcridxanasında saxlanma şəraiti və məhbuslarla davranış məsələləri, saxlanılan şəxslərin hüquqlarının təmin olunması vəziyyəti araşdırılıb, müəssisənin kameralarına, tibb-sanitar hissəsinə, yeməkxanasına, kitabxanasına, gəzinti yerinə baxış keçirilib.

Ombudsmanın Milli Preventiv Qrupunun üzvlərinin, ixtisasca həkim və psixoloq ekspertlərin də iştirak etdiyi ziyarət zamanı məhbuslarla necə rəftar edildiyini araşdırmaq məqsədilə saxlanılan şəxslərlə konfidensial görüş baş tutub.

Müəssisədə digər şəxslərlə yanaşı, 2023-cü il avqustun 1-də Azərbaycan-Ermənistan dövlət sərhədinin Laçın rayonunun Zabux kəndi ərazisindən keçən hissəsində dövlət sərhədini qanunsuz keçdiyinə görə həbs olunmuş Ermənistan vətəndaşı Rəşid Beqlaryan da fərdi qaydada qəbul edilib. Milli Preventiv Qrupun üzvləri tərəfindən ona öz dilində qanunvericilik aktları təqdim olunub.

Aparılan söhbət zamanı hər hansı fərq qoyulmadan R.Beqlaryanın da hüquqlarının təmin olunduğu, lazımi tibbi-psixoloji xidmətin göstərildiyi müşahidə edilib və özü də bu faktları təsdiq etməklə minnətdarlığını bildirib.