Türkiyə səfirliyi Azərbaycanı təbrik etdi

Türkiyənin Azərbaycandakı səfirliyi 8 noyabr – Zəfər Günü münasibətilə Azərbaycan xalqını təbrik edib.

Bu barədə diplomatik nümayəndəliyin “X” hesabında paylaşım edilib.

“Can Azərbaycanın torpaqlarının düşmən işğalından azad olunmasını müjdələyən 8 noyabr – Zəfər Günü münasibətilə bütün Azərbaycan xalqını ürəkdən təbrik edir, bu möhtəşəm zəfərin qazanılmasında canlarını fəda etmiş şəhidlərin əziz xatirəsini hörmətlə yad edir, qazilərə şəfa diləyirik. Zəfər Günün mübarək olsun, Azərbaycan!”, – deyə paylaşımda qeyd edilib.

Türkiyənin Ədalət və İnkişaf Partiyası sədrinin birinci müavini Binəli Yıldırım da “X” sosial şəbəkəsində 8 Noyabr Zəfər Günü ilə bağlı paylaşım edib.

“Bu gün Qarabağ torpaqlarının azadlığa qovuşduğu şanlı günün ildönümüdür. Bu gün 44 gün davam edən haqlı mücadilənin Zəfər Günüdür. Qardaşlarımı ən səmimi diləklərimlə təbrik edirəm”, – deyə paylaşımda bildirilib.

Qardaş Türkiyədən təbriklərə qoşulan digər qurum Türkiyə Milli Müdafiə Nazirliyi olub. Nazirliyin təbriki Azərbaycanın Dövlət Himnindən gətirilən sitatla yadda qalıb.

“Azərbaycan Türkü qardaşlarımızın 8 Noyabr Zəfər Gününü təbrik edir, qardaşlarımızı könüldən salamlayırıq”, – deyə təbrik paylaşımında qeyd olunub.