Ulu öndərin qurduğu dövlətin suverenliyini bərpa edən lider

2020-ci il sentyabrın 27-dən 2024-cü il aprelin 19-na kimi suverenliyimizin tam bərpası istiqamətində qət edilən yol Azərbaycan dövləti tarixinə qızıl hərflərlə yazılıb.

Əsrlər boyu torpaqlarını hissə-hissə itirən Azərbaycan 1969-cu ildə ümummilli lider Heydər Əliyevin respublikaya rəhbərlik etməyə başlamasından sonra sürətli inkişaf yoluna qədəm qoyub və torpaqlarımızın Ermənistana verilməsi prosesi dayandırılıb.

Ulu öndər Azərbaycanı məhv olmaq təhlükəsindən qurtarıb, müstəqil dövlət qurub və onu yeni inkişaf yoluna çıxarıb. Prezident İlham Əliyev isə Azərbaycanı güclü dövlətə çevirib, ölkənin ərazi bütövlüyünü və suverenliyini bərpa edib.

Lakin dövlətin qüdrətini nümayiş etdirən və onun davamlı inkişafını təmin edən əsas faktor həm də tam suveren olmasıdır. Məhz dövlət başçısı İlham Əliyev öz iradəsini ortaya qoyaraq Azərbaycanın taleyi ilə bağlı qurulan bütün ssenariləri alt-üst edib və uğurlu ordu quruculuğu ilə peşəkar diplomatiyanın tandemi öz məntiqi nəticəsi ilə yekunlaşıb.

Ölkə başçısı İlham Əliyevin adı Azərbaycan tarixinə Qalib Dövlətin Qalib Lideri kimi qızıl hərflərlə yazılıb və bu gün hər kəs bu iradə ilə hesablaşır. Bunun nəticəsidir ki, bu gün Azərbaycan Cənubi Qafqazın güclü və lider dövlətidir. Artıq rəsmi Bakının iradəsindən kənar Cənubi Qafqazda hər hansı planın həyata keçirilməsi qeyri-mümkündür.