Vitse-spikerdən həmkarlar ittifaqlarına çağırış

“Azərbaycan Milli Məclisi tərəfindən əmək hüquqlarının müdafiəsinə yönəlmiş bir sıra qanunların qəbul edilməsi ölkədə insan və əmək hüquqlarının qorunması üçün etibarlı hüquqi baza yaradıb”.

Bunu Milli Məclis sədrinin birinci müavini Əli Əhmədov bu gün Bakıda keçirilən Azərbaycan Həmkarlar İttifaqları Konfederasiyasının (AHİK) VIII Qurultayında çıxışında bildirib.

Onun sözlərinə görə, məhz bu hüquqi baza əsasında Azərbaycan hökuməti vətəndaşların əmək hüquqlarının qorunması kimi məsuliyyətli vəzifəni uğurla həyata keçirir.

“Yeni çağrışlar həmkarlar təşkilatlarının fəaliyyətinin yenilənməsini gələcəkdə ciddi şəkildə tələb edəcək. Kütləvi şəkildə robotlaşma, süni intellektin tətbiqi əmək və işçi anlayışlarına yeni məzmun gətirir. Mən inanıram ki, biz artıq əmək sahəsində köklü dəyişikliklərin şahidi oluruq və gələcəkdə bu daha aydın şəkildə özünü göstərəcək”, – deyə Ə.Əhmədov sözlərinə əlavə edib.