Haber Global — Türkiyənin ümumrespublika xəbər kanalı

Haber Global 2018-ci ildən fəaliyyət göstərən Türkiyənin ümumrespublika xəbər kanalıdır. Kanalın yaranma tarixi maraqlı bir proseslə bağlıdır: ilkin olaraq "TR24" adı altında lisenziya üçün müraciət edilmiş, lakin həmin markanın başqa teleşirkət tərəfindən patentləşdirilməsi səbəbiylə bu ad rədd edilmişdir. Bunun ardından "Haber Global" adıyla müraciət edilmiş və lisenziya müsbət cavabla nəticələnmişdir. Beləliklə, 2018-ci ilin avqustunda kanal yayımına start vermiş və qısa müddət ərzində Türkiyənin aparıcı xəbər kanallarından birinə çevrilmişdir.

Yayım coğrafiyası və format

Haber Global xəbər buraxılışları və proqramları ilə geniş tamaşaçı auditoriyasının rəğbətini qazanmışdır. Kanal Digiturk, D-Smart, Tivibu, Kablo TV və TV+ platformalarında, habelə Türksat peyki vasitəsilə yayımlanır. Canlı yayım YouTube kanalı üzərindən də izlənilə bilər.

Uğurlar və tanınma

Türkiyədə keçirilən "Marka Zirvəsi"ndə "Türkiyə Altın Marka Mükafatı" çərçivəsində "İlin xəbər kanalı" nominasiyası üzrə mükafata layiq görülmüşdür. Bundan əlavə, "Forbes Türkiyə" və "Statista"nın birgə keçirdiyi araşdırmanın nəticələrinə əsasən, Haber Global "Türkiyənin Ən Yaxşı İşəgötürənləri 2026" siyahısına daxil edilmiş və rəsmi sertifikata layiq görülmüşdür. Araşdırma 2025-ci ilin oktyabrından 2026-cı ilin fevralınadək davam etmiş, 200 mindən çox qiymətləndirmə əsasında formalaşdırılmışdır.

Media qrupu tərkibində

Haber Global Global Media Group şirkətlər qrupunun tərkibinə daxildir. 2017-ci ildə təsis edilən bu qrup Türkiyədə və xaricdə fəaliyyət göstərən televiziya kanalları, informasiya agentlikləri, xəbər portalları və qəzetləri əhatə edir.