20 minə yaxın bakalavr magistraturaya imtahan verib

Dövlət İmtahan Mərkəzi mayın 11-i ali təhsil müəssisələrinin magistraturalarına qəbul imtahanı (2-ci cəhd) keçirib.

Bu barədə Dövlət İmtahan Mərkəzi məlumat yayıb.

Bildirilib ki, imtahan Bakı, Sumqayıt, Abşeron, Naxçıvan, Gəncə, Mingəçevir və Lənkəranda, ümumilikdə 82 binada təşkil olunub. İmtahan saat 10:00-da başlanıb və 3 saat 30 dəqiqə davam edib. İmtahanda iştirak etmək üçün 20 547 bakalavr ərizə təqdim edib.

İlkin məlumatlara əsasən, imtahanda hər hansı pozuntu halı qeydə alınmayıb.

Qeyd edilib ki, mayın 12-dən etibarən DİM-də imtahan materiallarının emalına başlanılacaq. İmtahan nəticələri 2 mərhələdə elan olunacaq. Yaxın 3 gün ərzində qapalı və cavabları kodlaşdırılan açıq tipli tapşırıqların nəticələri elan olunacaq. Yekun imtahan balı isə xarici dil fənləri üzrə esse tapşırıqları yoxlanıldıqdan sonra ‒ 6 həftə ərzində təqdim olunacaq.