“21 yaşdan etibarən timus vəzi funksiyasını itirməyə başlayır” | Həkim

Rusiyalı həkim-onkoloq İlya Kolışevin sözlərinə görə, müasir elmdə qocalmanın vahid mexanizmi müəyyən edilməyib.

Yaşlanma prosesinə hüceyrələrin sərbəst radikalların təsiri ilə zədələnməsi, telomerlərin qısalması, zülalların qlikasiyası və hüceyrədaxili təmizlənmə sistemlərində yaranan pozuntular da daxil olmaqla bir sıra amillər təsir göstərir.

Kolışev bildirib ki, insan orqanizmində ən tez qocalan orqan immun hüceyrələrinin formalaşmasında mühüm rol oynayan timus vəzisidir. Təxminən 21 yaşından etibarən bu vəz tədricən yağ toxuması ilə əvəz olunur və zaman keçdikcə funksiyasını itirməyə başlayır.

Onun sözlərinə görə, piy toxuması, qan damarları, ürək-damar sistemi hüceyrələri, sümük iliyi və bağırsaqlar da digər orqan və toxumalarla müqayisədə daha sürətlə qocalır.

Ağır yüklənmələrə baxmayaraq, qaraciyər yüksək bərpa və təmizlənmə qabiliyyətini uzun müddət qoruyub saxlayır.

Onkoloq əlavə edib ki, orqanizmdə ən gec qocalan toxuma isə sümük toxumasıdır. Mütəxəssis qocalmanın qarşısını tam alan universal dərmanın hələlik olmadığını da vurğulayıb. Onun sözlərinə görə, sağlam həyat tərzi bu baxımdan həlledici rol oynayır.