4810 metr yüksəkliyə qalxan “Baku TV” əməkdaşı yaşadıqlarını danışdı

“Global Media Group”a daxil olan “Baku TV”nin əməkdaşı Fərdin İsazadə Avropanın ən yüksək nöqtəsini fəth edib.

O, Alp dağlarının 4810 metr hündürlüyündə yerləşən Monblan zirvəsinə qalxıb.

Jurnalist həmin anları belə xatırlayır:

“Monblanda iki düşərgə var. Hər ikisində gecələmək lazımdır ki, dağın havasına öyrəşəsən. Çünki oksigen çatışmazlığı olur. Buna görə də müəyyən yüksəkliklərdə bir gecə qalmaq vacibdir. Lakin xəbər gəldi ki, hava şəraiti gecəyə doğru pisləşəcək. Qərara aldıq ki, dayanmadan birbaşa zirvəyə doğru gedək. Getdik, çatdıq və elə zirvəyə çatmağımızla çovğun başladı. Bizdən sonra yola çıxanlar isə geri qayıtmalı oldular, gedə bilmədilər. Əslində, orada hər şey hava şəraitindən asılıdır. Qalxıb-düşmək təxminən 2 günümüzü aldı, halbuki 3 gün çəkməli idi”.