5 dəqiqənizi alacaq 5 məşq | Düzgün duruşun insana faydaları

Rusiyalı ortoped-travmatoloq Vitali Skakun masa arxasında oturarkən sağlam duruşu saxlamağın yollarından bəhs edib.

“Düzgün duruş oynaqlarda və əzələlərdə stresi azaldır, qan dövranını yaxşılaşdırır və xroniki ağrıların qarşısını alır” deyən həkimin sözlərinə görə, gün ərzində 5 məşqi etmək cəmi 5 dəqiqə vaxtınızı alacaq.

Birincisi boyunun uzadılmasıdır. Düz oturun, çiyinlərinizi aşağı salın, başınızı sağa əyərək qulağınızla çiyninizə toxunmağa çalışın, amma çiyninizi qaldırmamaq şərtilə. 10 saniyə belə qalın və sonra digər istiqamətdə təkrarlayın.

İkinci məşq onurğanın burulmasıdır. Ayaqlarınızı yerə qoyaraq stulda oturun, əllərinizi stulun arxasına qoyaraq bədəninizin yuxarı hissəsini sağa bükün, bu vəziyyətdə 10-15 saniyə saxlayın, sonra sola təkrarlayın.

Üçüncü çiyinlərin dairəvi hərəkətləridir. Çiyinlərinizi qulaqlarınıza doğru qaldırın, sonra onları geri və aşağı yuvarlayın. Çiyinlərinizlə 10 dəfə irəli-geri yavaş dairəvi hərəkətlər edin. Dördüncüsü, əllərinizi dizlərinizin üstünə qoyun, nəfəs alarkən kürəyinizi bükün, sinənizi qaldırın və çiyinlərinizi geri çəkin, çənənizi sinənizə sıxın.

Beşinci məşq yan əzələlərin dartınmasıdır. Sağ qolunuzu başınızın üstünə qaldırın və sola əyilərək bədəninizin yan tərəfində bir uzanma hiss edin, mövqeyi 10-15 saniyə saxlayın, sonra tərəfləri dəyişdirin.

Duruşu qorumaq üçün başqa bir yaxşı vərdiş fasilə verməkdir. Hər 30-40 dəqiqədən bir ayağa qalxın və uzanın. Əgər bel və oynaq ağrıları xroniki hal alırsa və ya idman rahatlıq vermirsə, mütəxəssisə müraciət etmək vacibdir.