Fiziki aktivlik yuxusuzluqdan sonra beynin fəaliyyətini gücləndirir

"Kəskin yuxusuzluqdan sonra edilən fiziki məşqlər yuxu çatışmazlığının beyinə göstərdiyi mənfi təsirləri, xüsusən də yaddaş və diqqət pozuntusunu azaltmağa kömək edir".

Bunu rusiyalı həkim, tibb elmləri doktoru İnessa Yakimoviç deyib.

"Fiziki aktivlik tam yuxunu əvəz edə bilməz, lakin kifayət qədər yatmaq mümkün olmadıqda koqnitiv fəsadları qismən aradan qaldırmaq üçün praktik bir vasitə rolunu oynaya bilər. Buna görə də əgər gecə yaxşı yata bilməmisinizsə, qısamüddətli idman hərəkətləri günü normal keçirməyinizə kömək edəcək. Lakin bu, mütəmadi olaraq yuxudan imtina etmək üçün əsas deyil – uzunmüddətli sağlamlıq və orqanizmin bərpası məqsədilə tam keyfiyyətli istirahət mütləqdir", – deyə həkim bildirib.

Yakimoviç əvvəllər kanadalı alimlər tərəfindən aparılmış tədqiqatın nəticələrini də şərh edib. Həmin eksperiment zamanı sübut olunub ki, kəskin yuxusuzluq hallarında koqnitiv funksiyaların xüsusi bir istiqamətini – epizodik yaddaşı qorumaq üçün 20 dəqiqəlik məşq 90 dəqiqəlik yuxu qədər effektiv nəticə verə bilər.

Həkimin sözlərinə görə, eksperimentdə həm yuxu, həm də idman hərəkətləri orqanizmə baş vermiş yuxusuzluqdan sonra göstərilən müvəqqəti kömək kimi qiymətləndirilir.

"Əgər yatmaq şansınız varsa, ən yaxşı seçim məhz yuxudur. Yuxu beynin bərpa olunmasına şərait yaradır, məsələn, yatan qrupda yorğunluq əlamətləri nəzərəçarpacaq dərəcədə azalmışdı. Fiziki yük isə fərqli mexanizmlə təsir edir; o, yorğunluq hissini aradan qaldırmasa da, informasiyanı qəbul etdiyi anda beynin onu daha effektiv emal etməsinə dəstək olur. Başqa sözlə, məşq itirilmiş yuxunun yerini doldurmur, sadəcə olaraq, yuxusuzluq şəraitində daha yaxşı fəaliyyət göstərmək üçün müvəqqəti təkan verir", – deyə mütəxəssis vurğulayıb.