7 nəfərin şəxsiyyəti müəyyənləşdirildi | Qazaxıstandan təyyarə qəzası ilə bağlı məlumat

Aktau yaxınlığındakı təyyarə qəzasında həlak olan 7 nəfərin şəxsiyyəti müəyyənləşdirilib. Bu barədə Qazaxıstan Fövqəladə Hallar Nazirliyi məlumat yayıb.

Bildirilib ki, 6 Qazaxıstan vətəndaşı və 3 ekipaj üzvü daxil olmaqla həlak olan 38 şəxsin meyiti məhkəmə-tibbi ekspertiza mərkəzinə çatdırılıb.

Məlumata əsasən, ekspertlər faciə yerində tapılan “qara qutu”nun üzərində işləyir və hadisə yerində 24 saatlıq növbə təşkil edilib. Bildirilib ki, fəsadların aradan qaldırılmasına 306 nəfər, 101 texnika, 2 hava gəmisi və 6 kinoloq briqadası cəlb olunub.

Qazaxıstan Tibb Mərkəzinin psixoloqları Aktauya gələn qəza qurbanlarının qohumlarına yardım göstərirlər. Qaynar xətt və təcili psixoloji yardımın əlaqə nömrələrinə 1032 müraciət daxil olub.

Qazaxıstan Fövqəladə Hallar Nazirliyi 3 ekipaj üzvünün meyitinin tapıldığını da bildirib. Bu barədə Qazaxıstan mətbuatı məlumat yayıb. Tapılan meyitlərin pilotlar – İqor Kşnyakin, Aleksandr Kalyaninov və stüardessa Hökumə Əliyevaya aid olduğu təxmin edilir.

Qeyd edək ki, digər ekipaj üzvləri stüard Zülfüqar Əsədov və stüardessa Aydan Rəhimli isə müxtəlif dərəcəli xəsarətlər alıblar.