8 nömrəli məktəbdə monitorinq imtahanında nə baş verib? | Təhsil idarəsindən açıqlama

Mayın 17-də paytaxtdakı ümumi təhsil müəssisələrinin IV sinifləri üzrə monitorinq imtahanı təşkil edilib.

Bakıda 8 nömrəli tam orta məktəbdə keçirilən monitorinq imtahanının təşkili isə valideynlərin narazılığına səbəb olub.

Bu barədə Baku TV-nin qaynar xəttinə məktəblilərin valideynləri müraciət ediblər.

Belə ki, valideynlərin iddialarına görə, şagirdlər saat 09:00-da imtahana girsələr də, imtahan vərəqələri onlara 3-4 saat sonra paylanılıb.

Valideynlər həmçinin iddia ediblər ki, imtahan başlayandan 150 dəqiqə sonra bitməli olsa da, şagirdlər 4-5 saat məktəbdən buraxılmayıb. Məktəbin qarşısında gözləyən valideynlər isə bu haldan narahat olaraq övladlarının buraxılmasını tələb ediblər. Valideynlərin tələbindən sonra uşaqlar göz yaşları içində məktəb binasından çıxıblar.

Məsələ ilə bağlı Bakı Şəhər Təhsil İdarəsindən bildirilib ki, 4-cü sinif şagirdləri üçün keçirilən monitorinq zamanı bir imtahan mərkəzində texniki məsələlərlə bağlı problem yaranıb.

“Bununla bağlı operativ tədbirlər görülüb. Uşaqlara optimal vaxt ərzində biliklərini nümayiş etdirmək üçün müvafiq vaxtın verilməsi təmin olunub. Monitorinq şəffaf şəkildə keçirilib və heç bir əlavə ajiotaj yaranmayıb”, – deyə qurumdan bildirilib.