Açıqlama verildi | Rəqsanə Moskvada saxlanılıb?

Rusiyanın teleqram kanallarında Azərbaycanın tanınmış müğənnisi Rəqsanə İsmayılovanın Moskvada saxlanılmasına dair məlumatlar paylaşılıb.

Bildirilib ki o, Rusiya Federasiyası Cinayət Məcəlləsinin “Rüşvət vermə” və “Sənəd saxtakarlığı” maddələri ilə ittiham olunur.

Xəbərə görə, Rəqsanə İsmayılova ölkənin Daxili İşlər Nazirliyinin Solntsevo şəhər idarəsinin əməkdaşı Yelena Smirnovaya qarşı 2023-cü ildə açılan cinayət işində şahid qismində dindirilib.

Ehtimallara görə, Smirnova adı açıqlanmayan Qurbanov soyadlı şəxslə birlikdə ən azı iki nəfərə saxta pasport hazırlamaqda ittiham olunur. Bu işin gedişatında dindirilməyə gətirilən Rəqsanə İsmaylova müstəntiqə öz sənədlərini təqdim edəndə məlum olub ki, onlar da saxtadır və 2019-cu ildə həmin işçidən – Smirnovadan alınıb.

İddialara görə, Rəksanə İsmayılova sənədə görə 650 min rubla yaxın pul da ödəyib.

Bu məsələ ilə bağlı müğənninin özündən reaksiya gecikməyib. O, şəxsi sosial media hesabında bildirib ki, yayılan məlumatlar həqiqəti əks etdirmir. R.İsmayılova paylaşımında qeyd edib ki, hazırda Moskvada öz evindədir və aprelin 10-dan sonra Azərbaycana gələcək.