ADNSU-nun yeni rəhbəri məlum oldu

Azərbaycan Dövlət Neft və Sənaye Universitetinin (ADNSU) rektoru vəzifəsi Vazeh Əskərova həvalə olunub.

Elm və təhsil naziri Emin Əmrullayevin əmri ilə Azərbaycan Dövlət Neft və Sənaye Universitetində Strateji məsələlər üzrə prorektor vəzifəsi yaradılıb və bu vəzifəyə ali təhsil ocağının nəzdində fəaliyyət göstərən Azərbaycan-Fransız Universitetinin icraçı direktoru, dosent Vazeh Əskərov təyin olunub. Nazirin digər əmri ilə Vazeh Əskərova universitetin rektoru vəzifəsi həvalə edilib.

Vazeh Eldəniz oğlu Əskərov 1978-ci ildə Bakı şəhərində anadan olub. Azərbaycan Dillər Universitetində bakalavr, Fransanın Mark Blok Universitetində 2 magistr, Strasburq Universitetində doktorluq təhsili alıb. “Strasburq Universitetinin doktoru” elmi dərəcəsinə sahibdir.

Fransada təhsil aldığı və yaşadığı müddətdə Vazeh Əskərov Azərbaycan diasporunun fəallarından biri kimi tanınıb, akademik fəaliyyətlə məşğul olub. Azərbaycan-Fransız Universitetinin icraçı direktoru vəzifəsinədək o, Azərbaycan Dillər Universitetinin rektor müşaviri, tədris işləri üzrə prorektoru vəzifələrində çalışıb.

Qeyd edək ki, Prezident İlham Əliyev iyulun 10-da Mustafa Baba oğlu Babanlının Azərbaycan Dövlət Neft və Sənaye Universitetinin rektoru vəzifəsindən azad edilməsi haqqında sərəncam imzalayıb.