Ağacların kəsilmə səbəbi açıqlandı | Piyada səkilərini zəbt edən budaqlar

Nəsimi rayonu, Səməd Vurğun küçəsində ağaclar doğranılıb. Bu barədə görüntülər sosial şəbəkələrdə yayılıb.

Bəs maraqlıdır ağacların bu cür doğranılmasına səbəb nədir?

“Bu ilin yay aylarında havaların qeyri-sabit keçməsi, küləkli günlərin sayının artması səbəbindən şəhərin müxtəlif ərazilərində qəzalı ağaclar insan həyatı ilə yanaşı, şəhər infrastrukturu, kommunikasiya xətləri və vətəndaşların əmlakına ciddi təhlükə yaradır”.

Bu barədə Yaşıllaşdırma Təsərrüfatı Birliyinin baş mühəndisi Cavanşir Məmmədov qeyd edib.

O bildirib ki, monitorinq nəticəsində aşkar edilən quru və qəzalı ağacların götürülməsinə rəy alınması üçün yerli icra hakimiyyəti və bələdiyyələr tərəfindən Ekologiya və Təbii Sərvətlər Nazirliyinin Dövlət Ekoloji Ekspertiza Agentliyinə müraciət edilib.

“Nazirliyin mütəxəssisləri tərəfindən ərazidəki ağaclara baxış keçirilib və quru, qəzalı, xəstəliklərə yoluxmuş ağacların götürülməsi barədə müvafiq rəylər verilib”, – deyə o vurğulayıb.

Həmçinin qeyd olunub ki, payız mövsümündə götürülən hər bir ağacın yerində yerli iqlimə uyğun yeni ağaclar əkiləcək.