Yollarda təmir başladı, tıxac artdı | Nəsimi rayonunda sakinlər çətin durumda - Baku TV

Yeni tədris ilinin başlaması ilə paytaxt yollarında hərəkət intensivləşib.

Eyni zamanda Bakının bir sıra küçələrində aparılan təmir, bərpa və qazıntı işləri nəqliyyatın hərəkətində əlavə çətinliklər yaradır.

Hazırda Nəsimi rayonunun Ceyhun Hacıbəyli küçəsində də qazıntı işləri aparılır. Ərazidə hərəkət zolağının böyük hissəsi qazıldığı üçün avtomobillər yolun dar hissəsindən keçməli olur. Bu isə xüsusilə pik saatlarda sıxlığın yaranmasına səbəb olur.

Ərazidə qazıntı işləri ilə əlaqədar toz-torpaq da müşahidə olunur. Avtobus dayanacağı isə qazıntı sahəsinin daxilində qaldığından sərnişinlər avtobusa minmək üçün hərəkət zolağına çıxmalı olurlar.

Qeyd edək ki, Ceyhun Hacıbəyli küçəsində aparılan işlərin hansı qurum tərəfindən həyata keçirildiyi barədə ərazidə məlumatlandırıcı lövhəyə rast gəlinməyib.