"Gəlib taxta ilə vururlar ki...” | Beton parçaları və daşlar insanların başına “yağır” - Baku TV

Nəsimi rayonu, Salatın Əsgərova küçəsi, 145 ünvanında yerləşən binanın həyətinə aparan yol sakinlər üçün təhlükə mənbəyinə çevrilib.

Keçidin tavanındakı taxta konstruksiyalar köhnəlib, örtüyün bəzi hissələri dağılıb. Nəticədə, vətəndaşların üzərinə mütəmadi olaraq daş, qum və beton parçaları tökülür.

Sakinlərin sözlərinə görə, keçidin vəziyyəti ilə bağlı aidiyyəti qurumlara dəfələrlə müraciət edilsə də, indiyədək əsaslı təmir işləri aparılmayıb. Hətta qopan daş parçalarından biri uşağın başına düşüb.

Şikayətçilər bildirirlər ki, Fövqəladə Hallar Nazirliyinin əməkdaşları əraziyə baxış keçirərək akt tərtib edib və məsələni icra hakimiyyətinə yönləndirəcəklərini bildiriblər. Lakin bundan sonra da hər hansı tədbir görülməyib.

“Biz dəfələrlə həm Bakı Şəhər İcra Hakimiyyətinə, həm də Fövqəladə Hallar Nazirliyinə müraciət etmişik. FHN gəlib akt tərtib edib, məsələni icra hakimiyyətinə yönləndirəcəyini deyib. Oradan da məktub gəlib ki, tədbir görüləcək. Amma bu günə qədər heç bir dəyişiklik yoxdur. Uşaqlarım binanın girişinə çatanda mənə zəng edirlər, gedib onları qarşılayıram ki, başlarına daş düşməsin”, – sakinlərdən biri deyib.

Digər sakin isə problemin dəfələrlə kiçik müdaxilələrlə aradan qaldırılmağa çalışıldığını, lakin bunun nəticə vermədiyini bildirib:

“Bir neçə dəfə mənim də, övladlarımın da çiyninə daş düşüb. Heç olmasa, gəlib damın üstünü təmir etsinlər ki, biz də rahat gedib-gələ bilək”.