Pleyeri seçin:
“Bizi aldadırlar, heç kimin vecinə deyil!” | “Ləzzət Dünyası”nın rəhbəri şikayətə necə cavab verdi?
Xəbərlərimizi Google-da izləyin
Yeniliklərdən dərhal xəbərdar olun
Bəzən vaxtı keçmiş, bəzən isə etiketdə göstərilən qiymətlə kassadakı qiyməti fərqli olan mallarla marketlərdə tez-tez qarşılaşırıq. Elə hallar da olur ki, istehlakçıların hüquqları məhsulun çəkisi ilə bağlı pozulur.
Bu yaxınlarda sosial şəbəkələrdə “Ləzzət Dünyası” şirkətinə məxsus məhsulun çəkisi ilə bağlı yayılan görüntülər müzakirələrə səbəb olub. Belə ki, qablaşdırmasının üzərində 180 qram olduğu qeyd edilən məhsulun faktiki çəkisinin 164 qram olduğu üzə çıxıb.
Şirkət rəhbərinin sözlərinə görə, bu, təsadüfi haldır. Bildirilib ki, qablaşdırmada məhsulun çəkisi ilə bağlı 10 qramlıq mümkün itki nəzərə alınır. Lakin yaranmış fərqin çörəyin sıxlığı və ya qırıntıları ilə əlaqəli ola biləcəyi ehtimal edilir.
Şirkət rəhbəri uzun illərdir fəaliyyət göstərdiklərini və indiyədək belə halla qarşılaşmadıqlarını da vurğulayıb.
Azərbaycan İstehlakçılar Şurasının sədri Roman Qasımov isə bildirib ki, məhsulun faktiki çəkisinin qablaşdırmada göstərilən göstəriciyə uyğun olmaması istehlakçı hüquqlarının pozulmasıdır. Bu cür hallar qanunvericilikdə istehlakçının ölçüdə, çəkidə və digər göstəricilərdə aldadılması kimi qiymətləndirilir. Onun sözlərinə görə, müvafiq inzibati xətaya görə hüquqi şəxslər 4 min manatdan 6 min manatadək cərimələnə bilərlər.
Roman Qasımov qeyd edib ki, qida məhsulları istər qablaşdırılmış, istərsə də açıq şəkildə satıldıqda çəki qaydalarına əməl edilməlidir. İstehlakçının məhsulun çəkisini yoxlaması üçün şərait yaradılması da sahibkarın öhdəliyidir. Restoran və digər iaşə obyektlərində isə menyuda məhsulların çəkisi və tərkibi göstərilməlidir.
Antiinhisar və İstehlak Bazarına Nəzarət Dövlət Agentliyindən bildirilib ki, istehlakçı aldığı məhsulun çəkisinin düzgün müəyyən edilmədiyini və ya qablaşdırmada göstərilən çəki ilə faktiki çəki arasında fərq olduğunu aşkar edərsə, mağaza rəhbərliyinə müraciət edərək məhsulun çəkisinin yenidən yoxlanılmasını və ödənişin faktiki çəkiyə uyğun hesablanmasını tələb etmək hüququna malikdir.
Kopyalandı
Seçilmişlər
