Ağır cinayət işində təqsirləndirilən şəxslər hakim qarşısında

12 il əvvəl Rusiyada qadını zorlayaraq öldürməkdə təqsirləndirilən Seymur Məmişov və Elxan Xuduyevin cinayət işi üzrə məhkəmə araşdırması başlayıb.

Bakı Ağır Cinayətlər Məhkəməsində hakim Eldar İsmayılovun sədrliyi ilə keçirilən iclasda təqsirləndirilən şəxslərin anket məlumatları dəqiqləşdirildikdən sonra cinayət işinin məhkəmə baxışına verilməsi ilə bağlı qərar qəbul edilib. Daha sonra dövlət ittihamçısı Eldar Həmzə ittiham aktını elan edib.

Dekabrın 17-də keçirilməsi nəzərdə tutulan növbəti prosesdə təqsirləndirilənlərin sərbəst ifadələri olacaq.

Qeyd edək ki, hadisə 2013-cü il iyunun 25-də Rusiyanın Tatarıstan Respublikası ərazisində baş verib. Azərbaycan vətəndaşları ‒ Seymur Məmişov və Elxan Xuduyev 1993 cü il təvəllüdlü Rusiya vətəndaşı Azaliya Azanovnanı zorladıqdan sonra boğub öldürmələrinə əsaslı şübhələr müəyyən edilib. İstintaq araşdırmaları ilə aydın olub ki, təqsirləndirilən şəxslər Azaliya Asanovnanı qətlə yetirdikdən sonra cinayətin izini itirmək məqsədilə meyiti əvvəlcədən qazdıqları quyuda basdırıblar.

Toplanmış sübutlar əsasında 2025 ci il martın 5-də hər iki şəxs Cinayət Məcəlləsinin bir neçə ağır maddəsi ilə təqsirləndirilən şəxs qismində cəlb olunaraq barələrində ittiham irəli sürülüb.