Aktyordan iddia | Türkiyəni bir-birinə vuran hadisə Azərbaycanda da olub?

Əməkdar artist Elnur Kərimov son günlər Türkiyə gündəmini zəbt edən "Yenidoğan şəbəkəsi"nin işinə diqqət çəkib.

Aktyor sosial şəbəkə paylaşımında belə bir hadisənin Bakıda da yaşandığını iddia edib.

"Son günlərdə Türkiyədə Yenidoğan hadisəsi mənə təəccüblü gəlmədi. Bakıda da var. Mən də bunun qurbanı olmuşam. İndi də övladımla bundan əziyyət çəkirəm", – deyə Elnur yazıb.

Qeyd edək ki, Türkiyədə "Yenidoğan şəbəkəsi"nin xəstəxanalarda yeni doğulmuş körpələrə yanlış diaqnozlar qoyaraq təcili yardım şöbələrindən özəl klinikalara yönləndirilməsi və bununla qanunsuz gəlir əldə etdikləri üzə çıxıb. Həmin şəxslər uşaqlara xüsusi maddələr verib onların vəziyyətini olduğundan daha ağır göstərərək uzun müddət klinikada saxlayıblar.

Uşaqların xüsusi iynələr vasitəsilə öldürüldüyü də məlum olub. Sağ qalan körpələrin səhhətində isə qəsdən problemlər yaradılıb.

Ümumilikdə şəbəkənin cinayət əməli nəticəsində 12 uşaq öldürülüb. Dəstə üzvlərinin İstanbulda əlbir olduqları 9 özəl klinikanın lisenziyası ləğv edilib.

Qeyd edək ki, rəsmi statistikaya görə, Türkiyədə son 10 ildə 3 mindən çox körpə xəstəxanalarda şübhəli şəkildə dünyasını dəyişib.