Ali təhsil müəssisələrində hansı dəyişikliklər oldu? - Tələbələrin diqqətinə!

COP29 ilə əlaqədar Bakı və Sumqayıt şəhərlərində, Abşeron rayonunda peşə, orta ixtisas və ali təhsil pillələrində tədris noyabrın 12-dən 22-dək distant formada keçiriləcək.

Bəs ali təhsil müəssisələri distant təhsilə hazırdırmı? Universitetlərdə distant təhsilə keçidlə bağlı hansı işlər görülüb?

Azərbaycan Texniki Universitetinin sözçüsü Sevinc İsgəndərova bildirib ki, COP29 tədbirləri çərçivəsində təşkil olunacaq onlayn dərslərlə bağlı fakültə rəhbərliyi təlimatlandırılıb:

“Onlayn tədris “Microsoft Teams” platforması üzərindən həyata keçiriləcək. Dərs cədvəllərində isə heç bir dəyişiklik olunmayıb”.

Azərbaycan Tibb Universitetinin mətbuat xidmətinin rəhbəri Günel Aslanovanın sözlərinə görə, sözügedən ali təhsil ocağı distant təhsilə tam hazırdır:

“Bizim universitetdə elektron tədris sistemi daxilində həftəlik mühazirələr bütün kafedralar tərəfindən qeyd edilib, dərs qeydləri, bütün materiallar PDF və video şəklində artıq yerləşdirilib”.

Qeyd edək ki, ölkəmizdə distant təhsil təcrübəsi pandemiya dövründə formalaşıb. COVID-19-la əlaqədar uzun müddət ölkədə təhsilin bütün pillələrində tədris distant formada həyata keçirilib.