Aqrar Kredit və İnkişaf Agentliyi şimal bölgəsinə mediatur təşkil edib - Baku TV

Kənd Təsərrüfatı Nazirliyi yanında Aqrar Kredit və İnkişaf Agentliyi tərəfindən 22 İyul – Milli Mətbuat Günü münasibətilə Quba, Qusar və Xaçmaz rayonlarında fəaliyyət göstərən təsərrüfatlara mediatur təşkil edilib.

Səfər çərçivəsində bölgədə fəaliyyət göstərən təsərrüfat subyektlərinə, meyvə və fındıq bağlarına, həmçinin aqroturizm və heyvandarlıq təsərrüfatlarına baxış keçirilib.

Mediatur iştirakçıları əvvəlcə Quba rayonunda aqroturizm xidmətləri göstərən təsərrüfatda olublar. Bildirilib ki, təsərrüfatın əsas məqsədi qonaqları kənd həyatı ilə yaxından tanış etmək və onların müxtəlif təsərrüfat proseslərində iştirakına şərait yaratmaqdır.

Daha sonra iştirakçılar Qusar rayonunda yerləşən ümumilikdə 356 hektar ərazini əhatə edən meyvə bağı və 5 min ton məhsul saxlama tutumuna malik soyuducu anbar kompleksi ilə tanış olublar.

Media nümayəndələri şimal bölgəsində 600 hektardan çox fındıq bağına malik təsərrüfata da baş çəkiblər. Bildirilib ki, güzəştli kreditlər və digər dövlət dəstəyi mexanizmlərindən istifadə olunmaqla təsərrüfatın fəaliyyəti genişləndirilib. Bağlarda hazırda fındığın yerli ata-baba və İtaliyadan gətirilən sortları becərilir.