Atası tərəfindən tərk edilən oğlan necə yataq xəstəsi oldu? - ARZUNUN VAXTI

“Arzunun vaxtı” verilişinin yeni buraxılışı yayımlanıb.

Proqramda müəllif və aparıcı Arzu Kəlbi avtomobil qəzası nəticəsində yataq xəstəsi olan 19 yaşlı Həmid Bağırovun evində olub.

H.Bağırovun anası Səidə İbrahimova bildirib ki, oğlu maaşını almağa gedərkən qəzaya düşüb.

“Həyat yoldaşım uşaqlara baxmırdı, onlar balaca olanda bizi tərk edib. Həmidin qəzaya düşməsi 2024-cü ilin dekabrında baş verib. Bu xəbəri mənə polis zəng edərək dedi. Oğlum bir neçə gün komada qaldı. Ayılandan sonra isə yataq xəstəsi oldu.

Həmin qəzanı törədən şəxs bizə kömək edir. Həmidin bütün xərclərini o qarşılayıb. Oğlum yataq xəstəsi olduğu üçün çox pis oluram, əlimdən heç nə gəlmir. İstəyirəm ki, sağalsın, ayağa dursun”, – o söyləyib.

Həmid Bağırovun sözlərinə görə, qardaşını oxutmaq üçün çalışmağa başlayıb:

“Ailəmə baxmaq mənim üzərimə düşürdü. Qardaşım məktəbə getmirdi, ona görə çalışırdım ki, dərsə getsin, oxusun. Pul çatdıra bilmirdik, fəhlə işləyirdim. Arzum var idi ki, böyük yerlərdə çalışım”.