"Bilmədim ki, məqsədi başqadır" | Fiziki məhdudiyyətli Ramid və Zeynəbin hekayəsi

“Arzunun vaxtı” verilişinin yeni buraxılışı fiziki məhdudiyyətli cütlük Ramid Əliyev və Zeynəb Əliyevanın sevgi hekayəsinə həsr olunub.

Zeynəb Əliyevanın sözlərinə görə, onların tanışlığı 2024-cü ildə kompüter kursunda başlayıb.

O bildirib ki, ilkin vaxtlarda Ramidin diqqətini hiss etsə də, buna əhəmiyyət verməyib. Daha sonra isə cütlük rəqs kursunda partnyor olub:

“Mənə yaxınlaşıb “Instagram” hesabımı istədi, vermədim. Daha sonra dərs bəhanəsi ilə nömrəmi istədi, mən də verdim. Sonra yazdı ki, mənimlə tanış olmaq istəyir və fikri ciddidir. 2-3 il birlikdə milli rəqslər oynadıq. Həmişə rəqsdə ona kömək edirdim. Evdən yemək gətirəndə onunla paylaşır, şirniyyat alırdım”.

Zeynəb Əliyeva qeyd edib ki, ailəsi ilkin mərhələdə bu münasibətə razı olmayıb. Buna baxmayaraq, o, seçiminin arxasında qətiyyətlə dayanıb:

“Ailəm razı deyildi. Dedim ki, onu çox istəyirəm, xoşbəxtəm, onunla nəfəs alıram. Ailəm məni Ramidə vermir deyə çox ağlamışam. Hətta demişdim ki, məni ona verməsəniz, qaçacağam. Ramid həmişə deyirdi ki, səbirli ol, hər şey yaxşı olacaq. Sonda ailəm razılıq verdi və dedilər ki, gəlsinlər istəsinlər. Ramid çox mehriban, eqosuz və ailəsinə sadiq insandır”.